الصفحة الرئيسية

تذكرون احلامنا واحنا صغار؟
البنت تحلم بفارس ياخذها و بحبيب يحضنها ويحميها من اي شي مو زين
والصبي يحلم بسياره سبورت
معنى احلامنا
ان البنت على اختلاف مراحل عمرها يغلب عليها الخيال و الرومانسيه
والصبي على اختلاف مراحل عمره يهتم بالواقع
الله سبحانه وتعالى خلقنا بهذا الاختلاف عشان تتوازن الحياه
نكبر ويكبر معانا تفكيرنا هذا
فنلقى البنت تخلي الدب او الباربـي جنها بنتها وتوكلها وتشربها
والا تتخيل انها عازمه رفيجاتها على جاي الضحى
والولد يلعب بسياييره الصغيره الفراري واللامبرغيني جنه محد قده بالدنيا
على كثر الاختلاف بين هالتفكيرين يرتبطون
مع بعض اول ما يحسون البنت والولد بالحب
لما يجتاحهم هالاحساس الحلو مثل موج البحر الي ايـي شوي شوي
حقنا ويتسرب من تحت ريولنا لين ما يغرقنا
ويا حلاتها من غرقه والا شرايكم
لما يحسون هالاثنين
ان الدنيا انقلبت وان مفاهيمهم كلها انقلبت معاها
لما يحسون بشعور انا احسه
جنه لما تركبون القليلبه تذكرونها الي بيوم البحار قبل
لما ترتفع القليلبه فينا فوق وبعدين تنـزل
والاحساس الي يصير في بطنا جنه احد يدلدغه
لكن مع الوقت يبدى تفكير الريال الاساسي الي خلقه رب العالمين عليه ياثر فيه اكثر فـيبدى يركز مره ثانيه على الواقع وتظل البنت على رومانسيتها الي قبل
وهنيه يبدى الحاجز ينبني بين الاثنين المره بخيالها ورومانسيتها والريال بتفكيره الواقعي
ويبدى يكبر ويكبر الحاجز لين نوصل حق المرحله الي ما كو مخلوق بالدنيا يبـي يوصل لها المرحله الي يمكن تشوفونها بعيونكم كل يوم لما تشوفون زوجين بالسياره كل واحد منهم يطالع الدريشه وكاشت بالثاني
جنه اهو بعالم واهي بعالم ثاني واذا تكلموا مع بعض تلقى كلامهم عن اغراض الجمعيه
والا العيال والا مشكله عائليه مع انها فرصه انهم طالعين بدون عيالهم وفيه الف كلمه وكلمه يقدرون يقولونها لكن تظل الكلمات
مـحبـــوسه
وتصير الحياه على جمالها ودفاها صقيع بارد وجاف من المشاعر
زين ليش ما نسوي لنا معادله صغيره
من الاشياء الموجوده عندنا نخلط هذا على هذا لين تكون النتيجه الحب
ليش ما نرد نجمع التفكيرين الواقعي والرومانسي الخيالي مع بعض
ويراعي كل طرف من الطرفين حاجات وطرق تفكير الطرف الثاني
فمره يعيشون حياتهم بواقعيه وبلحظات معينه يعيشونها برومانسيه
والله الحياة حلوه
ليش نخلي ايامنا الحلوه تظل ذكرى ليش ما نخليها تكبر معانا
صدقوني مو صعب بس نحتاج شوية حب على شوية تضحيه على شوية وعي بمتطلبات وظروف الشريك
على بساطه هالمعادله وسهولتها قله منا الي يعرفونها وقله الي يطبقونها بحياتهم
ليش ما الريال يذكر حبيبته انها حلوه بعيونه و يقول لها شكثر اهو يحمد ربه لانه لقاها وحبها وارتبط فيها ليش ما يمسك ايدها واهم يمشون بالسوق هذي عاد الي ادري صعبه عند اغلبكم مع انها حركه حلوه بس ليش اغلب الرياييل ما يحبونها ماادري
مخلي مرته تمشي وراه جنها وحده غريبه عنه لازم بينه وبينها متر
يعني انا سي السيد
ليش عاد ليش تعاملها جذي
انت منو تبي ترضي؟ تبي ترضي المجتمع وعشان ما يقولون
شفيه هذا زوجته متعلقه بايده والا شفيه مو مصدق عباله بتطير
والله الناس ما يخلون احد بحاله
زين المجتمع هذا بيفيدك لما تجف العلاقه الي بينكم
اذا بغيت تعطيها هديه مثلا لمناسبه من المناسبات ليش ما تعطيها الهديه
بدال لا تيبها بتغليف عادي ليش ماتتفنتق شوي بتغليفها وتعطيها الهديه مع ورده
ولما تعطيها الهديه ليش تعطيها اياها بطريقه عاديه ليش ما تسوي جو شويه لما تعطيها الهديه ما قلنا لك روح حط لي المكان كله شموع بس على الاقل شغل اغنيه
معينه اثنينكم تحبونها
الغالبيه يشوفون انه كل هالكلام كلام فاضي وتلقونه يقول بقلبه بعد مو تبي اذكر عيد ميلادها وايب لها هديه كاني ذكرته و يبت هديه شتبي اكثر صج دلع حريم

هذي اهي المشكله لازم كل واحد فيهم يعرف احتياجات
الطرف الثاني
و البنت او المره لازم هم اهي تقدر فرق التفكير بينها وبين ريلها
او حبيبها ماله داعي تصير حساسه على كل شي
انتي تدرين انه يحاول يسعدج قد ما يقدر حاولي تقدرين محاولاته حتى لو كانت محاولات متواضعه وحاولي تفهمين الكلام الي ما يقوله بصوته لكن اكيد يقوله بافعاله
خلوا الحياة جزر ومد
مو كله زعل ونجره وعوار راس
اتمنى اني قدرت اوصل لكم الي ودي اقوله
وسامحوني على الاطاله.
 

أقسام فرعية

أرسل مقالة